Powěsće: štwórtk, 16.05.2024

W Rakecach móhł w blišim času wjetši nakupowanski centrum nastać. Jako prěni krok je gmejnska rada srjedu přihłosowała, zo měła firma z Hamburga zwěsćić, kelko a kotre wobchody Rakečanska wokolina znjese. Nimale jednohłósnje so gmejnscy radźićeljo za tajki koncept wuprajichu, dokelž Rakecy na přikład dawno hižo ani žanu tankownju abo BHG nimaja. Tež wjesnjanosta Swen Nowotny ma plany za hobersku šansu za Rakecy.

Dźěłowy kruh za serbske naležnosće města Budyšin je so srjedu z předźěłanjom serbskich wustawkow města zaběrał. Na namjet wyšeho měšćanosty je so doporučenje za měšćansku radu wobzamknyło, zo ma so dźěłowy kruh do přirady přetworić. Tuta přirada nima so jenož kaž dotal w serbskich wustawkach jewić, ale do hłownych wustawkow města zapisać, zo bychu so serbske zajimy centralnišo w dźěle měšćanosty a měšćanskeje rady zakótwili. Přirady maja wjetše prawa hladajo na poradźowanje komunalnych organow hač jednore dźěłowe kruhi.

Strach afriskeje swinjaceje mrětwy njeje hišće nimo. Wokrjes Budyšin warnuje dale před tym, jědźne zbytki do přirody sypnyć. Jeli dźiwje swinje je žeru, móže so mrětwa přez tute zbytki přenjesć. Hačrunjež je tuchwilu po informacijach krajnoradneho zarjada lědma nowych padow swinjaceje mrětwy, strach akutny wostawa. Wobsedźerjo psow dyrbja swoje psy připasać a za lajnu wodźić, dokelž słuša Budyski wokrjes hišće do zawrjeneho pasma 2. Ćežišći stej mjez druhim rewěraj Bluń a Spale.

Serbske studentske towarstwo Sorabija Lipsk je na swojej hłownej zhromadźiznje wutoru nowe předsydstwo wuzwoliło. Nowy předsyda je Antonijo Matik, jeho zastupuje Filomena Kurjatec. Nowa finančnica je Paulina Weidlichec. Stare předsydstwo wokoło Luizy Nowakec je swój nadawk po dwěmaj lětomaj wotedało. Sorabiji Lipsk přisłuša wokomiknje 67 čłonow.

Sakska natwarna banka SAB je loni 237 milionow eurow spěchowanskich pjenjez za wjac hač 2.300 projektow w Budyskim wokrjesu přepokazała. To je 9,2 procentaj wšěch w tutym času za Saksku přizwolenych pjenjez było. Tole zdźěli nawodnica předsydstwa SAB Katrin Leonhardtowa na lětnej a bilancowej nowinarskej konferency. SAB je so 1991 załožiła a je spěchowanska banka Swobodneho kraja Sakskeje. Wona podpěruje kraj při spjelnjenju zjawnych nadawkow.

Šulerki a šulerjo 5. lětnika Serbskeje wyšeje šule Ralbicy su srjedu partnersku šulu w čěskim Mělniku wopytali. Dźěći wobeju kubłanišćow předstajichu kulturny program, po tym zhromadnje sportowachu. Po wobjedźe wobhladachu sej čěscy a serbscy wuknjacy centrum Mělnika, prjed hač so Ralbičenjo nawječor z busom domoj nawróćichu. Wuměna mjez Ralbicami a Mělnikom wotměwa so wot lěta 1970.