Powěsće Serbskeho rozhłosa

Pod hesłom "Łužiski swět bajow" přewjedu w Kulowje, Čornym Chołmcu, Wulkich Ždźarach a Wojerecach temowe tydźenje, kotrež so mystiskemu swětej Krabata wěnuja. Sobotu připołdnju je ze swjedźenjom we Wojerecach zahaja. W tamnišim Łužiskim centeru su w přichodnymaj tydźenjomaj wšědnje tež serbske akcije a poskitki planowane. Za sobotu steji wjedźenje po "šuli 1900" na programje. Župa Wojerecy a projekt Zari jako partnerej poskitki za cyłu swójbu wuhotuja.

Na serbskich zakładnych a wyšich šulach kaž tež na Serbskim gymnaziju wuknje nimale 40 šulerjow po statusu inkluzije. To zdźěli krajny zarjad za šule a kubłanje LASUB na naprašowanje. Najwjace tak mjenowanych i-dźěći wopyta Serbsku wyšu šulu w Radworju a w Budyšinje. Su to šulerjo, kotřiž trjebaja wosebitu pedagogisku podpěru při wuknjenju a we wšědnym šulskim dnju. 

Budyska pišćeletwarska firma Eule je we Wienje z wottwarom Buckowskich pišćelow w barokowej Marijinej cyrkwi započała. Kaž šefina Ann-Christin Eulowa praji, su wot wutory štyrjo sobudźěłaćerjo z tym zaběrani, instrument do jednotliwych dźělow rozebrać. Tute potom z nakładnym awtom do Budyšina dowjezu. Tu chcedźa potom dźěle wurjedźić a reparować. Zaměr je pišćele tak rekonstruować kaž běchu wone originalne w lěće 1858. Instrument z časa romantiki słuša k najwažnišim zwukowym pomnikam Wiena. Franz Liszt, Anton Bruckner a Max Reger na pišćelach hrajachu. Za projekt, kiž płaći wokoło 900.000 eurow, su we Wienje pjenježne dary hromadźili.

Na druhi spěwny wječor pjatk w Komorowje pola Rakec je tamniši młodźinski klub přeprosył. 60 zajimcow wot wječora sem přewažne serbske spěwy spěwachu. Tež žónski chór Rakecy, čłonojo Rakečanskeje bjesady a skupina "Přezpólni" su někotre štučki zaspěwali. Nimo toho nazwučowaštaj žónski chór a skupina "Přezpólni" zhromadny serbski spěw "Zerja so šěrja" kotryž budu na lětušej chórowej serenadźe w Rakecach wšitke zhromadźene chóry zaspěwać.

14 hrajerkow wubranki trenuja tutón kónc tydźenja zhromadnje w Choćebuzu. Kaž zamołwita za zjawnostne dźěło Tereza Wićazowa zdźěli, dyrbjachu pjatk žony sylneho dešća a njewjedra dla trening přetorhnyć. Město toho je so teoretiski dźěl wotměł. Sobotu přewjedźe so treningowa hra w Gießmannsdorfje a njedźelu wuhraja testowu hru w Slepom na U17 mustwo Energije Choćebuz. Je to posledni zhromadny trening žonow do Europeady.

Wudaće Wuhladka sobotu připołdnju moderěruje młoda Budyšanka Valentina Šołćic. 12-lětna gymnaziastka bě jedna z 15 dźěći, kiž su so za nadawki při wosebitym wudaću serbskeho telewizijneho magacina na dźeń dźěsća z widejom powabili. Jej po boku prezentuje 11-lětna Hanka Cyžec z Kozarc powěsće za dźěći. Wuwzaćnje wusyła Wuhladko hižo w 11:00 hodźin.